Ushuhuda: Mganga Asha akabidhi Mkoba wake Kanisani

Huyu siyo mwingine, bali ni Asha Mohammedi kutoka kijiji cha Kipera (Mzumbe - Morogoro).

Kwa nini afanye hivyo? Kipi kilimsibu? Fuatilia Ushuhuda huu wa ajabu,  kweli na wa kusisimua.

Asha Mohamed (36) Alipatwa na matatizo ya magonjwa kwa muda mrefu. Alikuwa na kazi ya hotelini, na kila akienda kazini, mambo yake hayaendi kama alivyotarajia. Ilifikia kipindi fulani boss wake akamfukuza kazi. Ndiposa alianza biashara ya kuuza kuku sokoni Buguruni Dar es Salaam. Biashara ilikuwa nzuri sana ila mwishowe kila akihesabu fedha yake anapata pungufu. Nyakati nyingine akajikuta hata mtaji wake unazidi kupungua siku hadi siku na kuku wa biashara akiwa nao, mathalani 300 hivi, wanaokufa ni zaidi ya 30. Kipindi hiki alikuwa na mume Muislamu baada ya kuachana na mumewe Mkristo, ambaye kwa maelezo yake walipendana sana ila ndugu zake Asha walilazimisha wawili hawa waachane ili aolewe na Muislam mwenzake.
Kwani ilikuwa je hata mara hii aolewe na Muislamu? Asha anadokeza kuwa alifunga ndoa mwaka 2010, na hakujua ndoa hii ilianza je!!. Anasema Majini ndiyo yalimuotesha ndotoni usiku juu  ya mume huyu mpya wa kiislamu atakayekuja kumuoa. Alirudi kwake nyumbani mara tu baada ya kupigiwa simu na kijana ambaye wala hakutarajia kuolewa naye. Walifanya taratibu zote na wakaoana.  Ingawa mume huyu naye ni wa pale kijijini Kipera, lakini Asha anasema alimpa sharti huyu mwanaume, kuwa hajazoea maisha ya kijijini hivyo baada ya ndoa itabidi warudi Dar es Salaam. Hata hivyo, ugomvi haukupungua nyumbani. Tokea akiwa na mwezi mmoja tu wa ujauzito, Asha alianza kuumwa  mfululizo na madaktari wasiweze kumpatia tiba. Siku zilipokaribia kujifungua, Asha alipelekwa Zahanati ya Mzumbe, lakini madaktari wakasema apelekwe Hospitali ya Mkoa wa Morogoro kwani wataalamu wa hali kama ile watapatikana. Hata hivyo,  alipofikishwa Hospitali Kuu ya Morogoro, madaktari bila hata kumpima, walimuingiza Chumba cha Upasuaji,  na wakamtoa mtoto. Bahati mbaya, mtoto yule aliishi muda mfupi tu,  na siku ya 3 kichanga hiki kikafariki dunia. Matatizo ya magonjwa kwa Asha yakaendelea kushika kasi.

Ndipo wakahamia TIBA MBADALA!!! Mmoja wa waganga wa kienyeji alikowahi kupelekwa kutibiwa alimwambia Asha kuwa anapaswa akakabidhiwe MKOBA. Mama mzazi naye alimshawishi Asha apokee huo mkoba ili kuumwa kwake kuishe. Akakubali kupokea mkoba huo Oktoba 2011. 

Je kuna gharama yoyote kupata mkoba kama huu? Ndiyo. Asha anasema ni gharama sana kupata mkoba,  na alilipia Sh. 150,000 (Laki na Hamsini elfu) kupatiwa mkoba huu. Mganga wa kienyeji aitwae Sefu anayeishi Kipera (hadi sasa) ndiye alimkabidhi mkoba huo.  Kazi ilianza rasmi ya kuagua.  Akawa anatibia wateja wengine wenye shida mbalimbali,  ikiwemo maradhi na kusuluhisha ndoa zao lakini yeye binafsi akabakia kuwa ni mgonjwa na hawezi kujitibia. Ndiyo maana, pamoja na uganga wake, Asha alikuwa akienda kwa waganga wengine maeneo mbali mbali Tanzania  kama Tanga, Sumbawanga n.k ili kujipatia tiba bila mafanikio.

Jumanne wiki jana (15/07/201) Asha alipelekwa kwa mganga mwingine, na ambaye ndiye wa mwisho kabla ya kuokoka na kuachana na ushirikina. Mganga huyu alimchinja jogoo na kumpika, kisha ile sahani yenye nyama za hiki chakula ikawekwa juu ya kichwa cha mama huyu. Baadae watoto 7 walitafutwa hapo mtaani wakaitwa ili kula hiki chakula juu ya kichwa cha Asha. Watoto hawa walipewa masharti kuwa, ni marufuku kutafuna mifupa ya huyo jogoo. Mumewe alipewa masalia ya mifupa ile na kwa kuwa Morogoro  hakuna bahari, aliagizwa akaitupe kwenye mto mmoja hivi huko Mlali ambao maji yake yametulia na hayaendi haraka. Alifanya hivyo, lakini pamoja na hayo, waliporudi nyumbani matatizo ya Asha yalimrudia upya. 

Yapi madhara ya ule mkoba? Kwa mujibu wa Asha, Mkoba ule haukumruhusu aoge, wala kufua,  wala kupiga mswaki. Siku nzima alikuwa ni mama wa kulala kitandani tu. Mumewe ndiye alikuwa akifanya kazi za kufua nguo, kupika chakula n.k. kiasi kwamba ndugu za mwanaume walianza kufikiria kuwa mama huyu  amemwekea 'limbwata" mume wake. Hata wateja wake walianza kupungua na akimpata mteja wa sh. 5,000 ilikuwa ni bahati. 

Picha 2: Baadhi ya Shehena ya vifaa vya uganga (Mkoba) ambao Asha
alikabidhi kanisani kabla ya kuteketezwa kwa moto Ijumaa 18/07/2014

chanzo: email kutoka kwa grace fella,ufufuo a uzima morogoro